Молитвы св. блгв. вел. кн. Димитрию Донскому

Тропарь

Велика обрете в бедах тя поборника земля Русская, языки побеждающа. Якоже на Доне Мамаеву низложил еси гордыню, на подвиг сей прияв благословение преподобнаго Сергия, тако, княже Димитрие, Христу Богу молися, даровати нам велию милость.

Кондак

Подвиги твоими, святе Димитрие, страну нашу Бог сохрани, Давый тебе непобедимую. И ныне, предстателю крепкий, соблюдай молитвами святыми град твой Москву невредим от всех навет вражиих.

 
 

Молитва святому князю Димитрию

О святый благоверный великий княже Димитрие! Аще и не мнози быша дние земнаго жития твоего, обаче велик жребий приял еси от Содетеля всех Господа, еже прославитися в земли Российстей и блаженство вечное на Небесех получити.

Услыши нас, молитвенниче теплый, предстателю наш пред Господем неусыпный! Во дни мира и в годину нестроений не остави нас попечением твоим, научи ны покорны быти Божественному Промышлению, вся в житии нашем ко благу направляющему, Отечество наше молитвами твоими от нашествий вражиих, раздоров и нестроений защити и укрепи теплым твоим предстательством.

О святче Божий! Моли, купно со святою супружницею и сподвижницею твоею благоверною княгинею Евдокиею, да знаменается на нас свет Лица Божия, и, тем наставляеми, достигнем Царства Правды Христовы, нескончаемаго и вечнаго. Аминь.